Антикор 108 миллиард теңге көлеміндегі шығынды қайтарды - Тоқаев
Мемлекет басшысы Сыбайлас жемқорлыққа қарсы іс-қимыл агенттігінің басшылық құрамымен кеңес өткізіп, алдағы кезеңге арналған бірқатар міндет жүктеді, деп хабарлайды Arbat.media.
Президент Сыбайлас жемқорлыққа қарсы іс-қимыл агенттігінің басшылық құрамымен бейнебайланыс арқылы өткен кеңес кезінде жаңадан тағайындалған төраға Асхат Жұмағалиды таныстырған.
Жиын барысында Қ.Тоқаев Сыбайлас жемқорлыққа қарсы саясаттың 2022-2026 жылдарға арналған тұжырымдамасында көрсетілген шараларды толық жүзеге асыру керектігін атады.
Тергеу жұмыстарының нәтижесінде Агенттік құны 108 миллиард теңге көлеміндегі шығынды қайтара алды. Бұл – оң нәтиже. Бірақ сонымен қатар бұл өткен кезеңдерде жемқорлық қаншалықты белең алғанын көрсетеді. Жемқорлықтың барлық түрімен ымырасыз күрес – мемлекетіміздің одан әрі дамуының басымдығы. Бұл істе Сыбайлас жемқорлыққа қарсы іс-қимыл агенттігі шешуші рөл атқарады. 2019 жылы маусымда құрылған сәттен бері аталған орган көптеген жұмыс атқарды, – деді Қасым-Жомарт Тоқаев.
Бұған дейін аталған агенттікті басқарған Олжас Бектенов президент әкімшілігінің басшысы болып тағайындалды. Бұл қызметті атқарған Мұрат Нұртілеу Премьер-министрдің орынбасары – Сыртқы істер министрі лауазымына бекітілді.
