Жаңаөзендегі мұнайшылар ұзақ уақыттан кейін келісімге келді

Жаңаөзендегі «БерӘлі Маңғыстау Company» ЖШС-ның бұрынғы қызметкерлері басқа компанияға жұмысқа тұруға келісіп, алда міндеттеріне кіріседі, деп хабарлайды Arbat.media.

Бұл туралы ҚМГ ресми түрде хабарлады. 

«ҚазМұнайГаз» бен «Өзенмұнайгаз-дың» арнайы жұмыс тобының Жаңаөзендегі  «БерӘлі Маңғыстау Company» ЖШС-нің бұрынғы қызметкерлерімен жүргізген келіссөздерінің нәтижесінде оларды «Мөлдір Мұнай Сервис» ЖШС-не жұмысқа орналастыру туралы келісімге қол жеткізілді. Аталған компанияға жұмысқа ауысқаннан кейін «БерАлидің»  бұрынғы жұмысшыларына бұрынғы еңбек жағдайлары толықтай сақталады», - деп жазылған аталған хабарламада.

Компанияның бұрынғы қызметкерлерін жұмысқа орналастыру шаралары «ҚазМұнайГаз» ҰК» АҚ қағидалары шеңберінде қатаң түрде жүргізілмек.

Биылғы 10 сәуірде Астанаға Жаңаөзендегі  «БерӘлі Маңғыстау Company» мекемесінің жұмыстан қысқарған 100-ге жуық қызметкері Астанаға келіп, наразылық білдірген еді. Оларды кейін күштік құрылым өкілдері тұтқындап, алып кетті. Кейін олардың арасындағы бірнеше адам келіссөзге қалып, қалғандары пойыз арқылы Маңғыстауға оралған болатын.