Қызылорда облысында Сырдария өзені арнасынан аса бастады
Қызылорда облысында Сырдария өзенінің Қармақшы ауданындағы Қызылтам ауылы маңындағы сағасы арнасынан асып кетті, деп хабарлайды Arbat.media.
Облыс әкімінің баспасөз қызметі өкілдерінің мәліметінше, су басу аймағындағы шаруа қожалықтарына, ғимараттар мен тұрғын үйлерге зақым келген жоқ. Зардап шеккендер де жоқ. Сонымен бірге, өңірде маңызы бар Жалағаш-Жосалы жолы уақытша жабылған.
Қазіргі уақытта облысқа Сырдария өзені арқылы секундына 778 текше метр су ағып келуде.
"21 ақпан мен 4 наурыз аралығында қабылданған шаралар нәтижесінде өзеннің Жаңақорған, Шиелі аудандары, Қызылорда қаласы, сондай-ақ, солтүстік аудандары - Сырдария және Жалағаш учаскелерінде мұз арқылы қозғалу қауіпсіз етілді. Қармақшы ауданындағы Қызылтам ауылы маңындағы қауіпті учаскеде өзен арнасынан асып кетті. Осыған байланысты аудандық маңызы бар Жалағаш-Жосалы (Жосалы ауылынан 43 шақырым, Жалағаш ауылынан 31 шақырым, Далдабай мен Қызылтам елді мекендері арасындағы) жолы уақытша жабылды", - деп мәлімдеді өңір әкімдігінің баспасөз қызметіндегілер.
Аталған жол Далдабай мен Қызылтам ауылдарын айланыстырады. Қазіргі уақытта аудан орталықтары - Жосалы, Жалағаш ауылдарынан апаратын ішкі жолдармен қатынауға мүмкіндік бар.. "Батыс Еуропа-Батыс Қытай" халықаралық тасжолы ашық және қалыпты жұмыс істеп тұр.
