Новости Казахстана•21 марта 2023, 19:36

Бұл сайлау – ауқымды өзгерістердің лайықты жалғасы - Тоқаев

Қазақстан президенті Қасым-Жомарт Тоқаев Астанада Наурыз мерекесіне қатысып, мерекемен құттықтады, деп хабарлайды Arbat.media.

Мемлекет басшысы өз сөзінде Мәжіліс пен мәслихаттар сайлауы барлық реформаларымызды ілгерілетудегі маңызды қадам болып табылатынын атады.

Кеше ғана өткен Мәжіліс пен мәслихаттар сайлауы – бүкіл реформаларымызды алға бастайтын өте маңызды қадам. Бұл сайлау – ауқымды өзгерістердің лайықты жалғасы. Осылайша, мемлекетіміз жаңа дәуірге қадам басты. Жалпы, еліміздің жаңа саяси келбеті қалыптасты. Тарихи сәт Ұлыстың ұлы күнімен тұспа-тұс келіп отыр. Мұның зор символдық мәні бар, - деді Қ.Тоқаев.

Мемлекет басшысы Жаңа Қазақстанның бүгінгі бейнесі Әз Наурызбен толық үндесетінін, Ұлыстың ұлы күнінде мүлде жаңа сипатқа ие болатынын тілге тиек етті.

Енді саяси жүйесі толық жаңғырған еліміз тың қарқынмен дамиды. Бұл реформалар экономиканың өсуіне, халық табысының артуына жол ашады. Реформаларымыз міндетті түрде жалғасын табады. Біз жан-жақты дамыған қуатты мемлекет боламыз! Бұл – негізгі мақсатымыз, - деді президент.

Сонымен бірге, мемлекет басшысы жастарға қамқор болып, оларға барынша жағдай жасалатыны туралы мәлімдеді.