Алматы емханаларында тұмауға қарсы екпе егу басталды

Алматыда 25 қыркүйектен бастап барлық емханада тұмауға қарсы екпе егу басталды, - деп хабарлайды Arbat.media.

Халықты иммундауға  тұмауға қарсы «Гриппол+» вакцинасының 250 мың дозасы сатып алынды. «Гриппол+» инактивация вакцинасы Ресейде өндірілген және құрамында тұмау вирусының А (H1N1 және H3N2) және В қосалқы типінің штамдары бар, - деп хабарлайды Алматы қоғамдық денсаулық сақтау басқармасы.

Бірінші кезекте: медицина қызметкерлері, медициналық мекемелерде есепте тұрған, жетім және ата-анасының қамқорлығынсыз қалған балалар, жүкті әйелдер мен 60 жастан асқан адамдар. Негізгі ауруға байланысты тұмаудың неғұрлым ауыр түріне бейім адамдар да вакцинациялануы керек.

Вакцинация науқаны қараша айының соңына дейін жалғасады. Тұмауға қарсы екпеден кейін толық иммунитетке жету үшін екі апта қажет. Осы уақыт ішінде тұмау және басқа вирустық ауру белгісі бар адамдармен қарым-қатынасты шектеген жөн.