Қырғызстанда қарт ата-анасынан бас тартқан балаларды түрмеге жабады

Қырғызстанның Жогорку Кенешінің комитеті кәрі әке-шешесін асыраудан бас тартқан балаларға жазаны қатаңдату жөніндегі заң жобасын бірінші оқылымда мақұлдады, - деп хабарлайды Arbat.media.

Бұл туралы «Кабар» агенттігі хабарлайды.

Құжаттың бастамашысы – депутат Тазабек Икрамов.

Оның сөзінше, заң жобасы еңбекке қабілетсіз және материалдық көмекке мұқтаж ата-анасын асыраудан бас тартқан еңбекке қабілетті, кәмелет жасына толған балаларға жазаны қатаңдату және мемлекеттік қызметтен шектеу мақсатында әзірленді.

Депутат атап өткендей, қазіргі заң балаларына жеткіліксіз көңіл бөлген ата-ананы жауапқа тартуға ғана мүмкіндік береді.

«Ал ата-анасын тастап кеткендерді жауапқа тарту үшін сот шешімі қажет», - деп толықтырды ол.

Ата-анасына қамқор болудан (алимент төлеуден) бас тартқан балаларға айыппұл салу немесе 1-2 жылға бас бостандығынан айыру ұсынылып отыр.

Заң жобасы жекелеген заң актілеріне – Қылмыстық кодекске, Отбасы кодексіне, «Мемлекеттік азаматтық қызмет және муниципалды қызмет туралы» заңға өзгерістер енгізуді қажет етеді.