Астанада талап қойған жаңаөзендіктермен келіссөздер жалғасып жатыр
"БерӘлі Маңғыстау Сompany" мекемесінің бұрынғы қызметкерлерімен келіссөздер жалғасып жатыр, деп хабарлайды Arbat.media.
11 сәуірден бастап Астанада арнайы комиссия жұмысын бастады. Оның құрамына Энергетика, Еңбек және халықты әлеуметтік қорғау министрлігі, "Самұрық-Қазына" ҰӘҚ" АҚ, "ҚазМұнайГаз" ҰК" АҚ өкілдері енген. Сонымен бірге, 10 адамнан құралған "БерӘлі Маңғыстау Сompany" компаниясының белсенді тобы бар.
Астанда талап қойғаннан кейін жаңазендіктермен жұмыс комиссиясы 3 рет отырыс өткізген. "БерӘлі Маңғыстау Сompany" компаниясының бұрынғы қызметкерлерінің басты талабы – «Өзенмұнайгаз» АҚ штатына жұмысқа орналасу болып отыр. Бастамашыл топқа бұл шарттың мүмкін еместігі айтылды. Ұйымға жұмысқа кезекте 9 мың адам тұрғаны айтылған.
"Талап қоюшылар қабылданған алгоритмдерге сәйкес бастапқыда коммуналды компанияларда жұмыс істейді, әрі қарай бос жұмыс орны пайда болғанда кезек бойынша "Өзенмұнайгаз" АҚ-қа жұмысқа тұрады. Келіссөз жүргізушілердің бұл талабы қала тұрғындарының мүдделері мен құқықтарына қайшы келеді. Екіншіден, сатып алу қызметін ұзақ мерзімге белгілеу мәселесі бойынша ҚМГ өкілдері «3+2» схемасы бойынша келісімшарт жасасуға дайын екенін білдірді. Ол бойынша келісімшарттар қосымша 2 жылға ұзарту құқығымен 3 жылға жасалатын болады. Сондай-ақ, жекелеген мәселелер бойынша "БерӘлі Маңғыстау Сompany" компаниясының бұрынғы қызметкерлерінің талаптары өзгерді: атап айтқанда, жерасты жөндеу жұмыстарының қосымша көлемін «Бұрғылау» және «МұнайФилдСервис» жеке компанияларына беріп, БерӘлінің бұрынғы қызметкерлерін осы компанияларға жұмысқа орналастыру мүмкіндігі айтылды", деп жазылған "ҚазМұнайГаз" ҰК" АҚ таратқан ақпаратта.
Алайда, алдын ала келіссөздерден кейін аталған компаниялардың басшылығы өз бригадаларының толық жүктелмеуіне байланысты мұндай қызмет түрін көрсетуге қызығушылығы жоқтығын мәлімдеді. Еңбекті қорғау және ұйымдастыру жағдайлары, бірыңғай тарифтік-біліктілік анықтамасын (БТБА) қолдану және тендер рәсімдеріне қатысты мәселелер бойынша тәуелсіз комиссия құруды мемлекеттік орган өкілдері қарастыруға және комиссияның күн тәртібі мен құрамын мүдделі органдармен келіскеннен кейін жауабын беруге дайын екендіктерін атаған.
Бұдан бөлек, ҚМГ өкілдері БерӘлі компаниясының бұрынғы қызметкерлерінің барлығын осыған дейінгі жалақысы мен әлеуметтік пакетін сақтай отырып, конкурс нәтижесінде жеңімпаз болған компанияға жұмысқа орналастыруға дайын екендігін алға тартты Қазіргі уақытта жоғарыда аталған мәселелерді талқылау жалғасып жатыр және тараптар қолданыстағы заңнамаға сай келісімге қол жеткізуге мүдделі.
Астанада Энергетика министрлігінің алдында талап қойған жаңаөзендіктердің бір легі Маңғыстауға қайтқан болатын. Алайда олар мәселе шешілмесе қайтадан Астанаға баратындарын мәлімдеді.