Ресей мұнай-газ өнеркәсібінде соғысқа байланысты жұмысшылар тапшы

Ресей Федерациясының мұнай-газ өнеркәсібінде соғысқа байланысты жұмысшылар тапшылығы байқалады. Ресейдің энергетика секторында биылғы жылы 40 000 қызметкер жетіспейді, деп жазады Bloomberg, - деп хабарлайды Arbat.media. 

Агенттіктің мәліметінше, мұнай-газ компаниялары қару өндірушілермен және әскерилермен жұмыс күші үшін бәсекелесуге мәжбүр.

2024 жылдың басында саладағы орташа жалақы шамамен 125 мың рубль болды. Бұл Ресей үшін жақсы ақша, бірақ қорғаныс өнеркәсібі мен армия қазірдің өзінде көбірек ұсынып жатыр.

Ресей Федерациясының кейбір аймақтарында Украинаға қарсы соғысқа қатысу туралы келісімшартқа қол қою үшін біржолғы төлемнің өзі миллион рубльге жетеді.

Ал егер жұмысшы Украинада соғысқысы келмесе, қару өндірушілермен тиімді келісімшартқа отыра алады.

2023 жылы ресейлік «Ростек» мемлекеттік корпорациясы қызметкерлерінің жалақысын орта есеппен 17,2%-ға өсірді, деп хабарлады оның бас директоры Сергей Чемезов.

Ресейде демографиялық дағдарыс салдарынан жұмыс күшінің тапшылығы ушығып барады.

2022 жылы Ресей нарығындағы 30 жасқа дейінгі жұмысшылардың үлесі 14,9%-ға дейін төмендеді.

FinExpertiza аудиторлық-консалтингтік компаниясының мәліметінше, бұл 1990 жылдардың басынан бергі ең төменгі көрсеткіш.