Бас прокуратура: СҚО 18 адам сепаратизм бойынша жауапқа тартылуда
Бас прокурордың орынбасары Жандос Өмірәлиев мәжіліс қабырғасында СҚО сепаратизм ісі бойынша қазіргі таңда 18 адам жауапқа тартылып жатқанын айтты, деп хабарлайды Arbat.media.
Жандос Өмірәлиев олардың іс-әрекеттері сараптамадан кейін ғана бағаланатынын айтты.
Әлеуметтік желідегі "Народный совет трудящихся" ұйымының мәлімдемелерінен кейін ҰҚК-нің Солтүстік Қазақстан облысы бойынша департаменті бірден қылмыстық кодекстің 180-бабының 2-бөлігі - "Бұқаралық ақпарат құралдарын пайдалана отырып, адамдар тобында сепаратизмді насихаттау" бойынша қылмыстық іс қозғады. Олардың тұрғылықты жерінде де, жұмыс орнында да тінту жұмыстары жүргізілді. Тәркіленген видеоға, сондай-ақ, әлеуметтік желідегі сюжетке сәйкес дереу сараптама тағайындалды, - деді ол.
Сараптаманы Әділет министрлігінің қызметкерлері жүргізуде. Жұмыс нәтижесі шыққан соң, қорытындыға сай әрбіріне нақты айып тағылмақ.