Төлен Тоқтасыновтың жаласына көне алмайын - Ғалымжан Жақиянов
Белгілі қоғам қайраткері, Павлодар облысының экс-әкімі Ғалымжан Жақиянов бұрынғы досы Төлен Тоқтасыновтың өзіне таққан айыбына қатысты мәлімдеме жасады, деп хабарлайды arbat.media.
Бұл туралы оның әйелі Қарлығаш Жақиянова әлеуметтік желіде жариялады. 2 қаңтар күні «Адырна» Ұлттық порталы өзінің ютуб арнасында белгісі саясаткер Төлен Тоқтасыновпен бейнесұхбатты жариялаған болатын. Онда Т.Тоқтасоынов өзінің бұрынғы досы Ғалымжан Жақияновтың достықтан гөрі ақшаны таңдағанын айтып, айыптаған. Осыдан кейін Ғалымжан Жақиянов жалған және негізсіз айып тағылғанын айтып, жағдайды түсіндірді.
Көптеген жылдар бойы Төлен менің досым болумен қатар, мен саяси репрессияға ұшырап, бас бостандығымнан айрылғанда маған орасан зор көмек көрсеткен серіктесім болды. Бұл үшін мен оған шексіз ризамын. Дегенмен, дәл қазіргі жағдайда мен өз беделімді сол ертеден келе жатқан досымнан қорғауға мәжбүрмін. Ең алдымен, Алматы қаласы Медеу аудандық сотында Тоқтасыновқа қарсы кредиторлар қозғаған азаматтық істе мен талапкер де, жауапкер де емес екенімді баса айтқым келеді. Мен бұл процесте бас құқығы және жеке мүддесі зардап шеккен үшінші тұлғамын. Ал енді фактілерге келсек. 2007 жылдан бастап, Тоқтасынов біздің ортақ таныстарымыздан бірнеше рет қомақты мөлшерде қарызға ақша алған, ал мұның бәрі маған біраз уақыттан соң ғана белгілі болды. Уақытында қайтармағаннан немесе қайтарғысы келмегеннен бе, ол барлық жауапкершілікті акционерлер келісімін алмастан, Моңғолияда тіркелген ALGT ltd компаниясына аударғысы келді. 2019 жылы қаржылық міндеттеме айналасындағы кикілжіңнен кейін Тоқтасыновтың жобадан шығуы жайлы мәселе қозғалды. Компанияның ішкі мән-жайы мен қарыздары туралы берілген мәлімет расталған жағдайда, ол алатын сома алдын ала анықталды. Сол соманың шамамен үштен бірін уақытында алды. Бірақ, келесі төлемдер тоқтатылды. Себебі, алдымен ішкі, кейін сыртқы тәуелсіз аудит жасап тексеру барысында (2022 жылдың бірінші жартысында жасалды) Тоқтасынов елеулі қаржылық былықтар мен алаяқтық жасағаны анықталды. Алайда, ол өзінің қаржылық манипуляциясына ешқандай түсіндірме берген жоқ. Менің де, оған ақша бергендердің де мәселені өзара бейбіт жолмен шешуге тырысқан әрекетімізден түк шықпады. Тіпті, қарызды қайтара алатын мүмкіндігі бола тұрып, қайтарудан бас тартты. Туындаған сұрақтарға жауап берудің орнына, Тоқтасынов маған шантаж жасап, қорқыта бастады. Менен ақша алмаған жағдайда, бұқаралық ақпарат құралдары арқылы менің қоғамдық беделіме нұқсан келтіретінін ауызша да, жазбаша да айта бастады. Маған қарсы арандатуда қазақстандық биліктің қолдауына ие болғанын да жеткізді, бірақ мен оның бопсалауын үзілді-кесілді қабылдамадым. Бас тарттым, деді Ғалымжан Жақиянов.
Осыдан кейін Төлен Тоқтасынов тура алты ай бұрын Ғалымжан Жақияновқа қарсы Моңғолияның құқық қорғау органдарына арыз берген. Алайда барлық жағдай мен құжаттарды жан-жақты тексеруден соң Жақияновтың тарапымнан ешқандай қылмыс не заң бұзушылық болмағаны мәлім болған көрінеді.
Қылмыс құрамы жоқ болғандықтан іс ашылмады. Барлық жағдай мен құжаттарды тексергеннен кейін, керісінше, Моңғолияның тергеу комитеті мен прокуратурасы ALGT ltd бұрынғы атқарушы директор ретінде Тоқтасыновтың өзін алаяқтық пен құжаттарды қолдан жасағаны үшін жауапқа тартуға шешім қабылдады. Өзі тапсырған ақпарат және менің өтінішім негізінде Моңғолия қылмыстық кодексінің 17.3-бабына сәйкес оған өзіне қарсы қылмыстық іс қозғалды. Тергеушіге берген уәдесіне қарамастан және заңды бұза отырып, Тоқтасынов 2022 жылғы 10 қазанда Моңғолиядан кетіп қалды, қазіргі уақытта оған халықаралық іздеу жарияланған, - деді Ғалымжан Жақиянов.
Қоғам қайраткері өз пікіріндегі барлық мәліметтерді Медеу аудандық сотына нақты құжатпен ұсынылғанын атады. Ол Төлен Тоқтасынов өзінің жеке басындағы қарыздары мен қаржылық борыштарынан шатасып, жауапкершілігін мойындағысы келмейтінін айтып отыр.
Мені ауыр қылмыс жасады деп айыптап, маған ашық жала жабуға кірісті. Мұндай жаласына көнетін ниетім жоқ. Маған қарсы ұйымдастырылып жатқан арандатуларда Тоқтасыновтың басты рөлді ойнауы өз шешімі ме, әлде біреулердің айдап салуы ма, әзірше анық айта алмаймын. Барлығы жақын арада әшкерленеді деп ойлаймын және соған сенемін. Сондай-ақ, біздің іскерлік және жеке қарым-қатынасымыздың қоғамдық талқылаудың тақырыбына айналғанына өкініш білдіремін, - деді Ғалымжан Жақиянов.
Төлен Тоқтасынов пен Ғалымжан Жақиянов ертеден бері жақсы араласқан тұлғалар. Бұл турады Ғалымжан Жақиянов өзінің «Өмір белестері» мемуарлық кітабында кеңінен жазған. Тіпті, 2000 жылдардың басында Төлен Тоқтасыновтың Мәжіліс депутаты болуын сол кездегі президент Нұрсұлтан Назарбаевпен келісіп шешкенін де жазады. Алайда кейін Н.Назарбаев Ғ.Жақияновқа Т.Тоқтасыновтың үлкен мәселе тудырғанын жеке кездесулерде бірнеше рет айтқан көрінеді.