Екі айда 3 мыңнан астам этникалық қазақ қандас мәртебесін алды

2023 жылдың басталғалы бері елімізде 3 мыңнан астам этникалық қазақ қандас мәртебесін алған, деп хабарлайды Arbat.media.

Еңбек және халықты әлеуметтік қорғау министрлігі  екі ай ішінде 3 134 этникалық қазақ тарихи отанына оралғанын мәлімдеді. Ал 1991 жылдан бері республикаға 1 миллион 110,1 мың этникалық қазақ оралған.

Жыл басынан Қазақстанға келген қандастардың жартысы (50%) Өзбекстаннан, 16,3% – Қытайдан, 15,9% – Ресейден, 8,4% – Түрікменстаннан, 4,5% – Моңғолиядан және 4,9% басқа елдерден. Келген этникалық қазақтар негізінен Алматы (27%), Маңғыстау (16,6%), Түркістан (7,1%) және Жамбыл (3,6%) облыстарына, сондай-ақ Астана (10,5%), Алматы (7,6%) және Шымкент (6,5%) қалаларына қоныстанды», - деп жазды министрліктің баспасөз қызметіндегілер.  

Биылғы 1 ақпанындағы жағдай бойынша еңбекке қабілетті жастағы этникалық қоныс аударушылар саны 69,1%-ды, еңбекке қабілетті жастан кіші 22,7%-ды және зейнеткерлер 8,2%-ды құрады.

Еңбекке қабілетті жастағы кандидаттардың ішінен білім деңейі бойынша 20,1% жоғары білімді, 40,9% орта кәсіби білімді, 35,2% жалпы орта білімді және 3,8% білімі жоқ.