Бокстан әлем чемпионы Махмұд Сабырханға Шымкентте пәтер берілді

Шымкент қаласының әкімі Мұрат Әйтенов бокстан әлем чемпионатының жеңімпазы Махмұд Сабырхан мен жеке жаттықтырушысы Илияс Оралбековты қабылдап, пәтер кілтін табыстады, деп хабарлайды Arbat.media.

 

Қала әкімі құрама қоржынына екінші алтынды салған спортшы мен оның жеке жаттықтырушысын құттықтап, алдағы Азия және Олимпиада ойындарына сәттілік тіледі. Әлемдік аренада еліміздің абыройын асқақтатып, туымызды желбіреткен спортшыға 2 бөлмелі пәтер, ал жеке жаттықтырушысына 5 миллион  теңге көлемінде ақшалай сыйлық табыстады.

 

Ташкентте өткен әлем чемпионатында Қазақстан құрамасы 4 алтын, 1 күміс медаль иеленген еді. Бұл сында 54 келіге дейінгі салмақ дәрежесінде сынға түскен шымкенттік М.Сабырханның да үлесі бар. Спортшы ақтық бәсекеде өзбекстандық Айбек Джураевты екі мәрте нокдаунға жіберіп, айқын басымдықпен жеңіске жетті. Жерлесіміз осыған дейін Куба, Гана, Үндістан мен Мажарстан спортшыларын жеңді.