Украинаның қарсы шабуылы қыста да жалғасады

Украинаның қарсы шабуылы қыста да жалғасады, - деп хабарлайды Arbat.media.

Бұл туралы CNN арнасына берген сұхбатында Таврия әскерлер тобының қолбасшысы Александр Тарнавский мәлімдеді.

Ол украин әскерлері негізінен жаяу, техникасыз алға жылжып жатқанын және осы себепті ауа райының қолайсыздығы украиндық қарсы шабуылға айтарлықтай кері әсер етпейтінін атап өтті.

Осыған ұқсас пікірді Украина Қорғаныс министрлігінің Бас барлау басқармасының (ГУР) басшысы Кирилл Буданов The War Zone басылымына берген сұхбатында айтты.

Америкалық соғысты зерттеу институтының (ISW) сарапшылары қысқы ауа райы құрлықтағы күштердің қозғалысын бәсеңдетуі мүмкін, бірақ қарсы шабуылдың біржола аяқталуына әкелмейтінін атап өтті.

Оның шарықтау шегі Ресей мен Украина арасындағы күш тепе-теңдігіне, сондай-ақ Батыстың Украинаға көмегіне көбірек байланысты болуы мүмкін, деп жазады ISW.