Қытай екі мемлекеттің аумағын қосып жаңа карта бекітті
Қытайдың «Стандартты карталардың картографиялық қызметі» мемлекеттік сайты 2023 жылға арналған ресми бекітілген географиялық карталардың жаңа жинағын шығарды, - деп хабарлайды Arbat.media.
Картада Ресей аумақтарының бір бөлігі Қытайдың бөлігі ретінде белгіленген, - деп жариялады РБК.
Әңгіме 2008 жылы Ресей мен Қытай арасындағы келісім бойынша бөлінген Амур өзенінде орналасқан Үлкен Уссурия аралы туралы болып отыр. Жарияланған картада арал елдің ең шығыс нүктесі ретінде бөлек көрсетілген, деп хабарлайды РБК.
«Карта Қытай мен әлемнің басқа да елдерінің шекарасын жобалаудың ұлттық стандарттарына сәйкес жасалған», - делінген түсіндірмеде.
Жаңа ресми карталар жинағы жаңалықтарда, кітаптарда, жарнама материалдарда иллюстрация ретінде пайдалануға арналған. Оны анықтама карта ретінде де пайдалануға болады, деп аталған сервисте.
Қытай «Оңтүстік Тибет» деп атайтын Үндістанның Аруначал-Прадеш штаты мен 1962 жылғы соғыс кезінде Қытай басып алған Ладактағы шекаралық Ақсай Чин аймағы да жаңа географиялық картада Қытай аумағының бір бөлігі ретінде белгіленген, - деп хабарлайды РИА Новости.
Үндістан Қытайға «Аруначал-Прадеш Үндістанның ажырамас бөлігі болған, болып табылады және әрқашан болып қала береді» деп бірнеше рет мәлімдеген.
Үндістан Сыртқы істер министрлігінің баспасөз хатшысы Ариндам Багчи картаның жариялануына байланысты Бейжіңге қатаң наразылық білдірді.
Сонымен қатар картада Тайвань аралы мен «тоғыз сызыққа», яғни Қытайдың Оңтүстік-Қытай теңізінің көп бөлігіне деген талаптары көрсетілген.